Projet "Crimes et châtiments"

faire a relascher de prison, Moyenant les
conditions et reserves suigvantes Premierement
que jassisterai tous Les dimenches et festes
solempnelles devotement a leglise, et vivrai
en femme de bien selon les ordonnance dicelle
Secondement que je ne hanterai les assemblees
comme Nopces beniesons comairaige, louvres
et costelz, Ains procurerai ladvancement de
mon menaige sans divaguer de courir ca
et la, en sorte que personne naura occasion
de soi complaindre de moi. Tiercement que
si aulcune ulterieure plaincte se faisoit contre
de moi que Je me rendrai entre les mains de la
Justice sans mabsenter Et finablement que
de ce mien emprisonement je ne me vengerai
par moi ou par aultres ny entreprendrai ny ferai
entreprendre de men venger, soit contre Sondit
Excellence Reverendissime, Messieurs ses officiers
leurs serviteurs, les tesmoings produis contre
de moi Leurs femmes familles biens et chevances.
Lesquelx pointz et articles jai promis et jure par
serement de tout en tout de par tout fidelement
garder et observer de mon millieur pouvoir
Que sil advient que en lung ou en laultre
je contreviengne, alors je me submectz destre
chastie au contenu des ordonnances penible
du sainct Empire, Ce que jai par serement
solennel, jure de garder et inviolablement
accomplir Et pour plus grande solempnite
et assurance jai prie le Notaire soubsigne,
de soubsigner le present acte en mon nom
Ce quil at faict a ma tres grande priere