Projet "Crimes et châtiments"

Reconfessions des actes crimes et
# de Sortilege
delitz # Commis et perpetrez par
Adelheit vefve Bourquin Betteny
De Boncourt, selon quicelle les
a heu recongnus et reconfesses
Librement, Les 17 : 19. 21. 25 et
27 de may an présent 1610
Premierement confesse que sont environ douze
ans, que a elle proche sa maison, entre
jour et nuict, se presenta par deux distinctes
fois, Ung homme a elle, la saluant, et
Luy demandant ce quelle faisoit, et sy elle
se vouloit donner a lui. Quil Lui donneroit
de lor et de largent. Et que surce ayant
volsus respondre a Icelui, et nommé et
appellé Le nom de Jesus, que tel homme
sestoit tousjour esvanouy et perdus.
Item confesse que par une troisieme fois, ledit
homme sestoit derechieff representé a elle
Et lavoit sollicité comme devant,
de se donner a lui, quil lui donneroit
de largent, et lui promectoit de jamais
ne la laisser, Ce, a quoi elle consentit
et surce se donna a lui
Item confesse que ledit homme lui conseilla
et persuada de renier Dieu Cresme et
baptesme et de le recepvoir lui ledit
homme pour son maître Lequel Il
disoit sappeller Hämmerlin, Ce que
a telle persuasion elle feist. Renia
surce dieu, Cresme, et Baptesme et
rint ledit hämmerlin pour son maitre.